رۆژنامە... نووس

رۆژنامە ئەو بڵاوكراوەیەیە بەرۆژ هەرچی روویدا تیا دەنووسرێتەوە، خوێندنەوەشی بەشەو ئیسراحەت ترە، هەموو كەسێكیش دەیخوێنێتەوە بێجگە لە مەسئولین، ئەوانەی شتەكانی ناوی دەنووسنەوە پێیان دەڵێن رۆژنامەنووس، هەركەسێكیش لەوان جنێوی تەڕو بوختانی رەش وماستاوی سارد بكات وبدات، ناسراوترو بەناوبانگ ترو دیارتر دەبێت.
ئێستا هەموو حزب وگرووپ ورێخراوو سەندیكاو وەزارەت و شارو قەزاو ناحیەو رەگەزو چین وتوێژو دەزگاو سەنتەرو پیاوو كوڕو ئافرەت وژن وكچ وخوشك و...هتد رۆژنامەیان هەیە.
رۆژنامەكانیش ئەنواعن، هەیە پیرەو تاقەتی سەرئێشەی نیە، هەیە هەرزەكارەو هەر خۆی بە پیاو ئەزانێ، هەشە منداڵە بە هەموو قسەیەك هەڵدەخڵەتێ.
رۆژنامەنووسیش ئەنواعن، هەیە كرێچیەو قەرزارە، هەیە خاوەنی كۆمپانیاو كۆشك وتەلارە، رۆژنامەنووس هەیە دەستی دەڕوا، هەشە قسەی ناڕوا، هەیە پشتی هەیەو ناترسێ،هەشە بێ پشتەو نانووسێ، هەیە پێی دەنووسن بە پارە، هەشە نانووسێ ئەگەر بیشیدەن لە قەنارە.
پیرۆزبێ جەژنەكەیان...نازانم هی كامیانە؟..

 باقی وەسلام

 رێبوار ئیدریس -   سفر تەغار!!..
 لەو گەرمیانە كاكی بەكاكیەی لای ئەو خوارە، دێیەك هەس پێی ئێژن (حەوتەغار)، بەو حسابەی ساحێبی (7) تەغار بوگە...كەچی كە سەیری ئەكەیت ودیقەت ئەدەی ئەوەندە پەڕپوت وكەساسە ئێژی دەواری شڕی بەر بایە و تەغارەكانیشی مەحف بوونەتەوە:
• تەغاری یەكەم: یەكەم گوندە لە كوردستان كە بە گوندی لەدایك بووەو هەر گوندیش دەمرێ، نزیكەی(1500) خانووەو هێشتا لادێیە، واتە دەگایە ولە بێخەبەری بێخەبەرانی ئیدارەی داقوق كەشكەك سەڵەوات..
• تەغاری دووەم: مەكتەبێكی سەردەمی دوابڕاوەكەی تیایە، بۆ هەموو شتێك دەست ئەدا بۆ عیلم ومەعریفەت نەبێ، دۆمینەشی تیا بكەی دوو شەش لەدەستا ئەتۆپێ..
• تەغاری سێیەم: هەموو ئەهلی ئیمانن، كەچی ئیمامی مزگەوت خریجی سەناعەیە..
• تەغاری چوارەم: لەتاو پاراستنی روحی تەبایی وبرایەتی، ئەنجومەنیان نیە، چونكە ئەمبەرو ئەوبەرەكەی هەركەس بەری خۆی پێ باش وجوانە..
• تەغاری پێنجەم: ئەگەر چاوت بێشێ وبێژن دوو دڵۆپە قیری تێبكە عەلەمی تیا نامێنێ، مەعلوم بەكوێری ئەمری.چونكە ئەو دەرمانە لەو وڵاتە نیست...
• تەغاری شەشەم: هەموو دیوەخانەكانیان ئاواڵەو كراوەن بۆ میوان وغەریبان، كەچی خۆیان لە دیوەخانی كەركوكدا جێیان نابێتەوە!..
• تەغاری حەفتەم: سەرەرای تەعریب وتەبعیس و ستەم، ئاخاوتنیان كوردی سافە، تەنها مەعنای یەك وشە نەبێت نایزانن ئەویش (ئاوەدانكردنەوەیە)، چونكە قەت پێویستیان پێی نیە!!
• تەغاری سفرەم: ئەنجومەنی شارەوانی كەركوك ....مەرحەبا!!!

هەر لۆ فشەی

شەوەكی خەوم لێ هەرمابوو.. هەرلۆفشەی دەنگەكی نازك بە تەلەفۆن پێیدەگوتم: ئەرێ نوستی؟ دەمویست هەرلۆفشەی جوابەك وەرامەكی بدەمەوە! كەچی قەپاتی دەكرد!! ئەوجارە نامەی بەموبایلی لۆ دەناردم: خۆشم دەوێی.. عەزم لێت كردیە.. قوربانتبم!! ئەمنیش مەراقم لێیدابوو، هەر پێم دەگۆت: كچێ بەس دامەخە.. بزانم هەوكە ڕەنگت وەكی دەنگت ناسكە.. ئەتۆ بەس خۆتم پێ نیشاندە، ئەوجا چت دەوێ لۆت دەكەم! وەڵا ئەویش ئەوجارەی جوابی دامەوەو گۆتی شێخە فشە ئەگەر ڕاست دەكەی سبیانێ جۆتەك پێراو و كراسەك و سەعاتەكی جوان و شوشەك بۆنم لۆ بەدیاری بینە، تا باوەڕت پێ بینم! سبیانێ ئەو چشتانەی داوای كرد بوو بەقەردی هەمووم لۆكڕی و گۆتم: ئەمن حازرم ئەتو لە كێندەری؟ گۆتی جیرانتانم، نیوڕانێ وەرە پێش دەركەی! خودایە چوومە پێش دەركەی..چ ببینم.. دەبینم خێزانم لەپێش دەركەی بە كەوگیرەكی لۆم ڕاوەستایەو تەلفۆنی لەدەستە و هەر پێم دەرێ: بڕەك وەرەپێشی، كا بزانم هەر لۆفشەی سەروبچمەت لۆ راست كەمەوە!

لە ڕۆژێكی وەك ئەمڕۆدا:
1 - لەڕۆژێكی وەك پێرێداو لەپانزەی مانگی گەلاوێژی دراوسێی معاون مودیرەكەماندا، خۆشی خۆشی، ویستم دوای نوێژی عەسر بچم بۆماڵی دەسگیرانەكەم، بەڵام هەر لە تەحییاتی یەكەما پێڵاوەكانیان لێ دزیم.
2 - لە رۆژێكی وەك چوارشەمەی دووسێ هەفتە لەمەوپێشداو لە مانگی كوتەك ڕێزانی ساڵی هەزارو هەشت سەدی بێ مەعنایی، لە كۆلێژی ئاداب كۆڕێكی شیعر بۆ شاعیرێك بەسترا بریتی بوو لە سێ شیعرو دوانزە گۆرانی.
3 - لەڕۆژێكی عەینەن ئیمڕۆداو لەبیست و شەشی قانونی هیچەمی ساڵی دووهەزارو هەشتی برێمەردا، زەوییەكی كرێچییانەم بۆ دەرچوو، دوای سێ ڕۆژ لێیان سەندمەوەو دایان بەكچە مەسئولێك.

ئەگەرو مەگەر
ئەگەر : ئەگەر كرێكارانی شارەوانی چوار لە هەولێر ئەو هەراوهوریایەیان نەكردایەو، كۆمپانیاكەشیان بە سنگی پان وبەرینەوە وەریان نەگرتایە، ئەی چۆن ئێمە دەبووینە موجتەمەعی مەدەنی..
مەگەر : مەگەر نازانی خاری من....پاش موزاهەرەكە یەكسەرو راستەوخۆ وعەسكەریانە، دوو كرێكاریان بە نان بڕاوی و برسیەتی رەوانەی ناو موجتەمەعە مەدەنیەكەیان كردنەوە...