ئێمەو كارەبای نیشتیمانی هەقایەتێكی دوورو درێژمان هەیە،ئەو دوو جمكە عاشقەین هەر لە دوای ڕاپەڕینەوە مێژووی عەشقمان بە چراو تیشكی مانگ دەنووسینەوە، سوێندمان خوارد دەستبەرداری یەكتر نەبین و بگرە بە سەدان كەس عەشقی كارەبا لێیدان و گیانیان لە دەست دا و دەتوانم بلێم: وەكو لەیل ومەجنوومان لێ هاتووە و كارەبای موەلیدەی گەڕەكیشمان لێ بۆتە بەكرۆك. چۆن؟
مەجنوون لە تاو شووكردنی لەیلا دەستی نایە ناو پشكۆیەك ئاگرەوە،ئێمەش لە تاو شۆرتی كارەبا دەستمان نایە ناو تەزووی كارەباوە، مەجنوون لە تاو لەیلا وێڵی سەحرا بوو،ئێمەش لە تاو نەهاتنەوەی كارەبا وێلی سەربان وحەوشە بووین،ولە تاو دووپشك وسیسارك وخەمە گڕوو مار شەوانە فرمێسكی زۆرمان لە گەڵ باوێشكداندا ڕشت،مەجنوون لە سەحرا لە تاو برسێتی وتێنوێتی دەم وچاوی سیس بوەوە،ئێمەش لە چاوەڕوانیی كارەبادا هاوینان عارەقەی شینی عەشقمان ڕشت ولە زستاندا سەرمای هەست تەزێنمان نۆش كرد.مەجنوون كە لەیلای دەبینی گیانی دەلەرزی ولە بەر خۆیەوە وڕێنەی دەكرد،ئێمەش كە كارەبامان دەهاتەوە بە یەك دەنگ هاوارمان دەكرد (ئەرێ وەللا كارەبا هاتەوە ).مەجنوون وازی لە كاروكاسبی هێنابوو،ئێمەش باجێكی گەورەی مانگانەی كارەبا ی نیشتیمانی وگەڕەك دەدەین ویەكێك كە پارەیەكی زۆری كارەبای بۆ هاتبوو بە فەرمانبەرەكەی گوتبوو: ئەرێ برا ئەگەر من لە جیاتی ئاوو نان وایەرو پلاك وگڵۆپی كارەبام بخواردایە ئەوەندە پارەم نەدەڕۆیی، لێرەدا ئێمە لە مەجنوونمان بردۆتەوە .مەجنوون لە تاو تێنوێتیی سەحرا هەوای زەمهەریری هەڵدەمژی وهاواری دەكرد تۆ لە كوێی لەیلا،ئێمەش لە تاو نەبوونی ئاو بە هۆی نەبوونی كارەباوە قوممان لە سۆندەی موزەخە دەداو كارەبا دەكوژایەوەو هاوارمان دەكرد بۆ ڕۆیشتی كارەبا.باش نیە مەجنوون قومی لە سۆندە نەدەداو كارەبا وشكی نەدەكردەوە!
.ژیان گۆڕا ئاومان زۆربوو، .شارەكانمان شانی لە شانی شارە جیهانیەكاندا گوندەكانمان پڕ لە ژیان كرانەوە،كێڵگەو دارستانەكانمان سەوز دەچنەوە،تازەترین مۆدێلی ئۆتۆمبێل وهێڵی فڕۆكە فڕكەیان دێ بە سەر ئاسمانماندا،نوێترین تەكنۆلۆژیای زانیاریمان هەیە، كەچی لە گەڵ كارەبا بە یەك نەگەیشتین وكارەبای موەلیدەی گەڕەك قەت ناهێڵێ بە یەك بگەینەوە! هەواڵی دڵ تەزێنی بەرزبوونەوەی نرخی كارەباو كەم بوونەوەی لە پڕی و ئنجا بەرز بوونەوەو دابەزین ووابزانم لە كۆتاییدا عومرمان تەواو دەبێ و لە كۆڵ موەلیدە نابینەوە،تكایە مەڵێن ئامین!!