عەلی فەرزات..پێنووسە پۆڵایینەكەی دیمەشق

نیگاركێش و كاریكاتێریستی ناسراوی وڵاتی سووریا (عەلی فەرزات) لە ساڵی 1946 لەدایك بووە، یەكێكە لە هونەرمەندە زۆر بەتواناكانی جیهانی كاریكاتێری عەرەبی، هاوپیشەو هاوهزری هونەرمەندی فەلەستینی (ناجی العلی) یە و چەندین بەرهەمی كاریكاتێری سیاسی و رۆشنبیری و فەلسەفی و كۆمەڵایەتیی بەربڵاوی لە رۆژنامەگەریی عەرەبی و جیهانیدا بڵاوكردۆتەوە، خاوەنی یەكەمین بڵاوكراوەی كاریكاتێری و تەنزە بەناوی(الدومری) لە سووریا، ئێستا ئەم هونەرمەندە قەڵەم پۆڵایینە هەمیشە وەك جاران تابلۆكانی لە ڕەخنەگرتن بەردەوام و پڕماناترن.

عەلی فەرزات ئەو هونەرمەندە ڕۆح سووك و رەخنەگرە زۆر توندەیە لە پایتەختی وڵاتی سووریاوە دەستی كرد بە كاری هونەری و هەر لەوێشەوە ناوبانگی هونەری خۆی و بەرهەمی شاكاری خۆی بە جیهان ناساند، نیگارەكانی لە زۆربەی بڵاوكراوە عەرەبی و بییانییەكاندا بڵاوكردۆتەوە و هەر لەو رووانگەیەوە چەندین خەڵاتی عەرەبی و جیهانی پێ بەخشراوە، لەنێویاندا خەڵاتی(ئەمیر دۆكڵاوس) ی هۆڵەندی ، جگە لەمانەش خانەی چاپ و بڵاوكردنەوەی (كۆن)ی ئەمریكی كتێبێكی ئەم هونەرمەندەیان بەناوی ( پێنووسە پۆڵایینەكەی دیمەشق) چاپ و بڵاوكردەوە، دواتر حكومەتی سووریا بڵاوبوونەوەی لەناوخۆدا قەدەغە كرد.
لە ساڵی 2000 دا یەكەمین بڵاوكراوەی ڕەخنەو تەنزئامێزی لە دەرەوەی دەزگا فەرمییەكانی ڕاگەیاندنی سووری بەناوی(الدومری) چاپ و بڵاوكردەوە، ناونیشانی ئەم بڵاوكراوەیەی فەرزات(الدومري) وشەیەكی سوورییە و بەواتای پیشەی ئەو پیاو دێتەوە كە پێش هاتنی كارەبا لە كۆڵانەكانی دیمەشقدا فانۆسی دادەگیرساند، دیارە ئەم ناونیشانەش لەگەڵ ناوەڕۆك و مەبەست و شێوەو روخساری بڵاوكراوەكەی فەرزاتدا یەكیاندەگرتەوە، چونكە رووناكی لە پاش خۆیەوە هێنایە رۆژنامەگەری سووریا و كاریكاتێر و تەنزی بەربڵاو كرد و چەمكە سوورەكانی شڵەقاند و رووتی كردەوە، بەتایبەتیش كە ئەم كەڵەهونەرمەندە حەزی لە دەستەڵاتێك نەدكرد لەسەر بنەمای گەندەڵی و بێدەنگی بەڕێوەبچێ، ئەو دەسەڵاتەی دواتر بووە هۆی پەلاماردانی بڵاوكراوەكە و بەپەلەپروسكێ دەركردنی بڕیاری داخستنی!
فەرزات بە هەمان شێوەی هونەرمەندانی پێشووتری خۆی لە پەنجەرەی ڕۆژنامەگەریی خلیجەوە دەیڕوانییە عەرەب و داهاتوویان، وەك ( ناجی العلی) ی فەلەستینی ( كە لە لەندەن تیرۆركرا) دواتریش لەجێی (ناجی) فەرزات سەرۆكایەتیی یەكێتی كاریكاتێریستانی عەرەبی گرتە ئەستۆ ، ئەم هونەرمەندە لە نیوەی یەكەمی هەشتاكانی سەدەی رابردوودا مشتومڕێكی گەورەی لەنێو بازنەی گرینگیپێدانی نێودەوڵەتییدا نایەوە، بەتایبەت لە( پەیمانگەی جیهانی عەرەبی) لە باریس ، بەهۆی ئەوەی حكومەتی بەعسی ئەوكاتی بەغدا بە یەكێك لە تابلۆكانی ئەم هونەرمەندە پەست و توڕەبوو ، بگرە جەختێكی زۆری دەكردەسەر لابردنی لە پێشانگاكەدا! دەنا...!! بەڵام پاش هێنان و بردنێكی زۆر و چەندین روونكردنەوەو مانگرتن و بەشداریكردنی چەندەها هونەرمەندی فەڕەنسی لە ڕەتكردنەوەی داواكانی حكومەتی بەغدا تابلۆ رەخنەییە رۆح سووكەكانی فەرزات بۆ ویژدانی هونەر و مرۆڤ هەر مانەوەو مانەوە! و تا ئەمڕۆكەش و بە ئێجگاری خۆی و خاوەنە سوورییەكەی زیاتر خستە ژێر تیشك، جگە لەمەش سەرنجی هەوادارانی هونەری كاریكاترێر لە پێشانگا و گەلەرەكانی پاریسدا بەلای خۆیدا راكێشا.